AMEA Yüksək Texnologiyalar Parkının (YT Park) kollektivi, eləcə də onun rezidentləri olan Təcrübə-Sənaye Zavodu, “Elm və Texnologiya Parkı” MMC və “Tak Noosh Group” MMC-nin əməkdaşları II Fəxri xiyabanda və Şəhidlər xiyabanında Birinci və İkinci Qarabağ müharibələrində şəhidlik zirvəsinə ucalan, Azərbaycanın müstəqilliyi və ərazi bütövlüyü uğrunda döyüşən, Vətən və xalq yolunda canını fəda edən şəhidlərimizin məzarını ziyarət ediblər. Vətən övladlarının xatirəsi bir dəqiqəlik sükutla anılıb.
Texnoparkın kollektivi şəhidlərimizin ölməz xatirəsinə bəslədikləri dərin hörmət və ehtiramın ifadəsi olaraq Əbədi Məşəl abidəsinin önünə əklil qoyublar.
Əməkdaşlar, həmçinin II Fəxri xiyabanda torpağa tapşırılmış, YT Parkın baş mühəndisi Rahim Heydərovun oğlu, Təcrübə-Sənaye Zavodunun əməkdaşı olmuş Rafiq Heydərovun məzarına baş çəkib, məzarı önünə əklil və gül dəstələri qoyublar.
Tədbirdə çıxış edən YT Parkın baş direktoru Vasif Abbasov bildirib ki, 44 gün davam edən Vətən müharibəsində Azərbaycan Respublikasının suverenliyi və ərazi bütövlüyü uğrunda gedən mübarizədə qəhrəmanlıq göstərən əsgər və zabitlərimiz, arxa cəbhədə çalışan mülki insanlarımız, bütövlükdə xalqımız əzm və iradə, birlik və həmrəylik nümayiş etdirib. Baş direktor Müzəffər Ali Baş Komandanın rəhbərliyi ilə Azərbaycan Ordusunun şanlı tarix yazaraq zəfər qazanmasının xalqımızda böyük inam və ruh yüksəkliyi yaratdığını bildirib. Əlavə edib ki, Azərbaycan xalqı hər zaman mübariz oğul və qızlarının şücaətini yüksək qiymətləndirir, bütün şəhidlərimizin ruhuna ehtiram göstərir, xatirəsini uca tutur.
Texnoparkın əməkdaşları Vətən müharibəsinin qəhrəman, cəsur döyüşçülərindən olan mərhum həmkarları Rafiq Heydərovun şərəfli döyüş yolundan danışıb, onunla bağlı xatirələrini bölüşüblər. Qeyd olunub ki, R.Heydərov gəncliyini, ömrünü Vətənə fəda edərək adını heç zaman unudulmayacaq qəhrəmanlar sırasına yazıb. Azərbaycan xalqının qüruru, fəxri olan bütün şəhidlərimizin, o cümlədən Rafiq Heydərovun xatirəsi bundan sonra da daim əziz tutulacaq.
Daha sonra YT Parkın kollektivi Hərbi Qənimətlər Parkında olub, Vətən müharibəsi dövründə döyüş meydanında davamlı məğlubiyyətlərə məruz qalan düşməndən əldə edilən atıcı silahlar, ağır texnikalar, raket kompleksləri, hərbi nəqliyyatlar və digər sursatlarla tanış olublar.
Vurğulanıb ki, İkinci Qarabağ müharibəsinin real nəticələri ilə daha yaxından tanış olmaq imkanı verən bu park gələcək nəsillərin tariximizi dərindən öyrənməsinə şərait yaradır.
Qeyd edək ki, Azərbaycan Respublikası Prezidentinin 2020-ci il 2 dekabr tarixli sərəncamı ilə 27 sentyabr günü Azərbaycanın ən yeni tarixinə Anım Günü kimi həmişəlik daxil olub.
